মুক্ত চিন্তাঃ ২

Silence is more eloquent than words !! সঁচাই ! মই সদায় চিঞৰি থাকো বন্ধু - বান্ধবী মহলৰ মাজত " মৌনতাই বহুত কথাই কৈ যায় " | নিৰ্জন সময়বোৰত মই যেতিয়া মোৰ সাধনাত অকলশৰে টোপনি চাবলৈ চেষ্টা কৰো - তেতিয়া অনুভৱ কৰো এৰি অহা অতীতৰ সুৱৰ্ণ সুৱাস আৰু সান্নিধ্য ক’তজনৰ ... আৰু আৰু অতি নিৰ্মমভাৱে অনুভৱ কৰো হেৰোৱাজনৰ অমৃত স্পৰ্শ ...! দোভাগ নিশাৰ কোলাহলহীন সময়বোৰ প্ৰাণভৰি ভাল পাওঁ মই | উপভোগ কৰো হিয়া উজাৰি কোনেও গম নোপোৱাকৈ ... | আনকি সম্ভৱতঃ ক্ষুদ্ৰ জীৱবিলাকে মই অহাৰ উমান পাই সিহঁতেই ছাগৈ প্ৰাণভৰি উপভোগ কৰে সময়কণ | যিহেতুকে মই যোৱা প্ৰায় কেইবাটাও বছৰ কংক্ৰীট জীৱন পাৰ কৰিছো; সেই হেতুকে মই নিশাৰ কোলাহীন সময়বোৰত কোনো ধৰণৰ কৃত্ৰিমতা নাৰাখি সম্পূৰ্ণ এন্ধাৰ নিশাত মাতাল হৈ যাওঁ | সৃষ্টিৰ উন্মাদনা, সৃষ্টিৰ অদম্য হেপাহ উপভোগ কৰো | মুকলি ভাৱে কথা পাতো নিজৰ অস্তিত্বৰ মাজত, শব্দৰ খেলা কৰো, অনাবিল চিন্তা কৰো নতুন নতুন দৃষ্টিৰে !!! এনেদৰে কোলাহলহীন নিশা পাৰ কৰো অদ্বিতীয়ভাৱে; য’ত বেলেগে নিদ্ৰাদেৱীৰ কোলাত অফুৰন্ত সুখত নিমজ্জিত হৈ থাকে | সেয়ে পুনৰ কওঁ মই - অনুপমা বসুমতাৰীৰ উক্তিৰে - " হে নিৰ্জনতা তোমাক আজি মই বৰ ভাল পাওঁ " | - - © ৰনৌজ কুমাৰ গগৈ ২৬ মাৰ্চ, ২০১৩

মুক্ত চিন্তাঃ ১

(২৪ মাৰ্চ ২০১৩, ১০ চ’ত ১৯৩৪ শক দেওবাৰ) সততে মানুহৰ মুখত শুনিবলৈ পাওঁ - " জোনটো" বস্তু আনিব লাগিছিল ..... প্ৰকৃততে "জোনটো" বুলি কয় নে ? নে মোৰেই বিভ্ৰান্তি !!! এইটো নিশ্চিত যে জোন পৃথিৱীৰ উপগ্ৰহ | আৰু মোৰ আজীৱন প্ৰেয়সীৰ নাম জোনজনী | সি যি কি নহওক, মই যিকোনো বা যিটো বুলি কওঁ এইক্ষেত্ৰত ; সিবিলাক কথা বেলেগলৈ এৰিলো | এতিয়া আহোঁ আন এটা কথালৈ ভাত বনোৱাৰ পৰা ৰন্ধালৈ | আজিকালি ৰান্ধনিয়ে ভাত বনায় ; ভাত নাৰান্ধে | আৰু মানুহবোৰে ’ ঘৰত যায়’ ; ঘৰলৈ নাযায় , ’খাব যায়’, কিন্তু খাবলৈ নাযায় | দেখা গৈছে বহুতে কালি আৰু কাইলৈ ৰ পাৰ্থক্য নাজানে | এনেকুৱা অলেখ উদাহৰণ মোৰ ওচৰত আছে | মই ক’বলৈ নাযাওঁ | যিহেতু মই ভাষা বিশেষজ্ঞ নহয়; ইয়াৰ সামান্য জ্ঞানো নাই | মাথোঁ কথা ক’ব পাৰো | অসমীয়া বৈদ্যুতিন মাধ্যমত দেখিছোঁ- " কাজিৰঙাত গঁড় চাব যদি আহক "| নাজানো কিয় তেনেদৰে লিখে - স্বনামধন্য লোকসকলে | যিসকলে অনবৰতে অসমীয়া ভাষাৰ বিস্তাৰ, অস্তিত্বৰ কথা কৈ সমালোচনাৰে পানী নসৰকা কৰে তেওঁলোকে এইক্ষেত্ৰত পণ্ডিত | - © ৰনৌজ কুমাৰ

কথা -- সুৰ

হু হুৱাই আগচোতালতে পৰিলহি পাৰজাক ; খাম বুলি ৰ’দত দিয়া ধান | ক’তনো পাব ককাদেউতাই আছেহি ৰৈ বৰ দীঘল টাঙোণ এডাল লৈ | আহিল সেই সময়তে ছাগলীৰ জাক ককাদেউতাই ছাগলী খেদোতো পাৰজাকে দিলে ৰুণ... গাঁৱৰ ধানৰ সবাহত আমাৰো যে আছে খোৱাৰ মুক্তিকামী পণ | -- © ৰনৌজ কুমাৰ গগৈ